黑丸 醬油豚骨拉麵（1734円）

HKD 88
呢碗拉麵有啲難以形容
可能本身抱住較大期望去食
我本身對醬油豚骨認識唔大
呢個湯底比我感覺非常濃 唔知算唔算好鹹
對我而言鹹嘅程度係影響咗對其他配菜嘅體驗

店家有告示補充
佢地嘅拉麵喺60度以上係最佳進食溫度
一低過60度有鹹味係正常
要用到呢個告示應該代表我並非第一人覺得太鹹
拉麵一嚟到枱面係非常之熱 呢點我係欣賞
但自問食嘢都算快 （快影咗一張相only)
但食咗幾啖已經覺得鹹到要飲水
呢餐我飲咗三杯水 目的係想沖淡口腔鹹味
我唔了解醬油與豚骨比例正常係如何分配
但呢碗感到嘅豚香味有啲微弱 鹹味佔大多

麵條揀咗細麵 硬度適中偏硬 都幾好
溏心蛋有半隻 調味我諗都稱得上係上乘
而慢煮叉燒偏細
但肉嘅油脂分布感覺都平衡
其實各樣配料都相當不錯
只可惜呢個極鹹嘅湯底影響咗每樣配料嘅發揮
又或者一開始睇評論上嘅資訊 多數讚不絕口
所以令我對呢間嘅期望太大了吧